Fondue ....

يوم اليمعة عزمني 3mrii  على مطعم وطبعن انا احب اجرب مطاعم يديدة قلتله خنروح مطعم فوندو رفيجاتي مادحينه لي وموصلينه لي ليه السما ....ممممممم

 هذا مدخل المطعم طبعن اللي مايعرفه المطعم صاير مجابل مجمع الصالحية

وهني داخل المدخل  الديكور وايد حلو  والجو العام وايد ريلاكس

بغيت اصورلي جم لقطة بس استحيت بعدين شيقولون عني الناس فصورت وانا بمكاني

 هذي صورة المنيو

طبعن رفيجتي milky ann وصتني اقعد داخل البوث كانت القعدة عجيييبة فيه واخذتلي جم لقطة وانا داخل  ...

الحين نيي حق الأطباق طلبنا ابتايزر كالاماري ومشروم محشي ...

طبعن الكالاماري  مقلي زيادة عن اللزوم وكان ناشف بس الصوص اللي وياه كانت عجيييييييبة اما المشروم وااااااااااي علمشروم موطبيعي ..

طلبنا انا و3mrii الفوندو المشكل اللي يكون فيه كل الانواع احنا اخترنا ربيان ودياي اسكالوب وستيك لحم  مع مكسيكان تشيز...

طبعن نفس المشكلة الدياي والربيان مقليين زيادة عن اللزوم وكان يابس الاكل بس اللحم موطبيعي كان حيل ترف اما الصوص ممم يعني عادية حيل حتى ماحبينا نطلب الحلو و3mrii  قعد يتحلطم علي عشان بالنسبة حقه الاكل مايترس العين كان شوية يعني مثلن شتبي نطلب حق جيش مثلن ؟؟

اي نسيت اوريكم الهوست مالتنا كانت حدها فرندلي وكيوت

تجربتي حق المطعم بشكل عام المكان روعة والجو هادي بس الاكل لكم عليه عادي حده ومعطينه اكثر من حجمه واسعاره معقوله بس كمية الاكل كانت شوية  انا اعطيه 6 من 10 ...

how did they get over there ?

وانا ناطرة على الإشارة اللي تحت الجسر بين كيفان والشامية ولا اشوف شي غريب لفت انتباهي .... 

شنو هذا  !!!

@@ المكتوب ( أمانة اذا ضاق صدرج خذي قلبي وتعلقي مادري تغلي مادري تعالي  فيه عاشق ارنوبة 3-19 )

قلت الاماكن عشان تكتبون عليافطة ؟؟ بس اموت واعرف شلون كتبها ؟؟؟

أي شييييييييييي ...

اليوم دق علي 3mrii من الصبح ولاحاطين على سيارته بروشور وصورلي اياه قلتله لازم انزله بالبلوق على طول انتو شوفو وحكمو 

 ههههههههه ماكو شغل صراحة اهم شي بعرف بس مقر الجمعية وين صاير ؟؟

حكمة اليوم

دع خطواتك في الحياة ..

كمن يمشي على الرمل ..

لا يسمع صوته ولكن .... أثره واضح

essie nail polish ..

 من فترة وصلني برودكاست هالصورة عن أصباغ الصيف وبصراحة عجبني هاللون وايد وقررت اشتريه بحكم اني ماعرف باجي الماركات ولا ادري وين احصلها  فقررت اشتري صبغ شانيل بس بصراحة يأست كل مارحت مكان قالولي انه هاللون كان ليمتد ايديشن وماراح ينزل منه مرة ثانية ليش ماشريتيه دامج تبينه ؟؟؟؟؟ انا شدراني انه راح يخلص !!!

المهم وللحين وانا عندي امل لآخر لحظة اني القى هاللون ذاك اليوم حنت علي توأم روحي نوور نروح صالون يديد اول مرة نجربه مع اني مالي خلق بس قلت يالله ومالو وانا هناك وفجأة ....

القى أصباغ معروضة ومن ضمنهم صبغي اللي ادور عليه واااااااااي ماتتصورون فرحتي :))) مع ان نوور ماكان عاجبها وزفتني عليه شهل الوان اللي تنقينها بس ماكو رفعت الجام عنها وشريته واليوم حطيت منه بصراحة نوووووووور الحمدالله اني ماطعتج اللون حده عجييييييييييييييييب وكلمن سألني عنه :)

اللون عجيب والماركة حلوة اللون ينشف بسرعه ومايتكتل ومايحتاج تحطون طبقات تكفي طبقة وحدة او طبقتين اووو اخليكم مع الصور وقولولي شرايكم فيه يستاهل ؟؟

اهم شي ايدي الجلحة مالكم شغل بالظاهر اهم شي المضمون ;)

على فكرة هذا تصويري بكاميرتي اليديدة شرايكم ؟

my new camera ...

امس حن علي الحب (ابو العيال ) الا بيروح الغانم شايفله تلفون بوخطين وانا بروحي مالي خلق قلت يالله شوارانا .. المهم وانا هناك كنت شايفتلي كاميرا من زمااااااااان خاطري فيها موعشان شي اول شي البكسل مالها وايد حلو 14 pxl والزوم ماشي حاله مع انه 4× بس وسعرها روعة بصراحة وماركتها ممتازة بس ياربي مو بس جذي  شي ثاني شوقني فيها ..

واي لونها موطبيعي حده عجييييييب جنها تقولي اخذيني .. اخذيني وانا ذبحوني علـ pinky pinky  شرايكم فيها مو حدها عجيبة :) 

 

عاد فرصة ويتلي بطيحلي تصور عدل وبوست على طوووووووول ;)

Hi all and welcome to my blog ....

السلام عليكم حياكم الله في صفحتي الخاصة.... مممم بصراحة ماني عارفة شقول بس حبيت اكوّن لي صفحة تعبر عن ارائي وتطلعاتي .. اهم شي تطلعاتي :) احب التصوير والسوالف والهياته والتعليقات فبشاركّم في بلوقي واعرض لكم آخر تصويرلي .. وين قزيت اليوم  .. شنو كليت اليوم ;) فحياكم الله وابي تعليقاتكم ... 

اختكم جورية